Umugambwe MSD uranegura "agasuzuguro" wakorewe na CENI

Umuvugizi w’umugambwe MSD, Fansisko Nyamoya aranegura ico yita agasuzuguro k’umurwi CENI wabahaye ibibanza bike mubazotegura amatora ku rwego rw’igihugu. Mu murwi CENI bavuga ko imigambwe yose idashobora kunganya, kuko hari n’iyitaronse n’umwe.

Umurwi w’igihugu ujejwe gutegura amatora uheruka gusohora urutonde rw’abagize imirwi y’intara ijejwe gutegura amatora (CEPI : Commission Electorale Provinciale Indépendante). Ku bagize umwo murwi 164 bazotegura amatora mu gihugu cose, umugambwe MSD wahawe abantu batatu gusa. Muri uwo mugambwe bavuga ko ari agasuzuguro, kubona bemewe n’amategeko, ariko ntibafatwe ku rugero rumwe n’iyindi migambwe, aho tukababwira ko hari imigambwe yahawe abagera kuri 17 n’abarenga. Fransisko Nyamoya, umuvugizi w’umugambwe MSD amenyesha ko inzego z’umugambwe zigiye kuzokorana kugira bagire ico bapfunditse kuri ico kibazo.

Fransisko Nyamoya, umuvugizi w’umugambwe MSD

Mu murwi w’igihugu ujejwe gutegura amatora (CENI : Commission Electorale Nationale Indépendante) basigura ko imigambwe yose idashobora kunganya, kuko hari n’iyitaronse n’umwe ayiserukira. Prosper Ntahorwamiye, ajejwe inyigisho muri CENI avuga ko atari imigambwe gusa yategerezwa kuja muri CEPI, kuko hari n’abaserukira amadini hamwe n’amashirahamwe adaharanira ivyicaro vya poritike. Nk’uko Prosper Ntahorwamiye abishikiriza, abatashoboye kuja muri CEPI borindira, bakaba bashobora kuzoshirwa muma CECI (Commission Electorale Communale Indépendante)

Prosper Ntahorwamiye, ajejwe inyigisho mu murwi CENI