Umwigeme w’imyaka 109 avuga ko kutabana n’abagabo vyatumye aramba

Jessie Gallen aheruka gukwiza imyaka 109 avuga ko kimwe catumye aramba cane kurusha abandi bantu ari kutabana n’abagabo.

Jessie Gallen w’imyaka 109 yabaye umugore (canke umwigeme) wa mbere afise imyaka myinshi mu gihugu ca Scotland aturukamwo. Uwo mugore yavutse mu muryango w’abana 7, abakobwa 6 n’umuhungu 1. Mu kiganiro yagize n’ikinyamakuru Dail Mail, Jessie avuga ko bimwe vyatumye aramba ari ugufungura neza hamwe no kugira imyimenyerezo y’umubiri myinshi. Mugabo ivyo ntibihagije, kuko yongera akavuga ko icatumye aramba ari cane cane kuba kure y’abagabo.

Uwo Jessie Gallen ntiyigeze yubaka urwiwe, kuko yabona ko bizana ingorane nyinshi zivuye ku bagabo, bigatuma umuntu agumana uburuhe bwo mu mutwe (Stress).

Jessie Gallen siwe gusa yatangaje ko gufungura neza bituma uramba, n’umugore afise imyaka myinshi kw’isi (imyaka 116), Misao Okawa, yavuze ko gufungura neza ari kimwe mu vyatumye abaho imyaka myinshi kw’isi, hamwe no kuruhuka bikwiye.

Ivyigwa bimaze gukorwa bimenyesha ko abagore batigeze bubaka izabo aribo babaho imyaka myinshi kurusha abagore bubatse.