Ibiganiro hagati y’impande zipfa uburongozi bwa COMIBU bigeze kure

Ibiganiro hagati y’umuhuza hamwe n’impande zose zegwa n’ikibazo kiri mu muryango w’abislamu mu Burundi COMIBU bigeze kure, nk’uko bishikirizwa na Evariste Nsabiyumva, umuvugizi w’urwo rwego rw’umuhuza w’abarundi.

Mw’ikete ryo kuwa 24 Kigarama 2014, umushikiranganji w’intwaro yo hagati mu gihugu yamenyesheje umuhuza w’abarundi ko yemeje inzego z’umuryango w’abaslamu zavuye mu nama ya bose yo kuwa 16 Munyonyo, yongera anamubwira ko yogerageza guhuza kuko amatati agihari hagati y’impande zibiri ziyitirira uburongozi bwa COMIBU (Communauté Islamique du Burundi). Kuwa 27 Nzero 2015, umuhuza yaremeye ko azobahuza kuva kw’igenekerezo rya 3 Ruhuhuma uno mwaka, ariko aca ahagarika inzego zatowe mu kurindira ikizova mu biganiro.Iryo sango rigeze yarakiriye imirwi itandukanye y’umuryango w’abisilamu mu Burundi, bose barashobora gutanga intererano mu gutorera umuti ayo matati. Umuhuza w’abarundi yumvirije irongowe na Cheikh Kajandi Abdallah, umuryango w’abisilamu bo mu ntara ya Muyinga na Kayanza, Cheikh Haruna Nkunduwiga, Cheikh Ali Sombwe, abashikiringanji n’abashingamateka, hamwe n’abakozi bakuru bakuru ba Reta bari muri uwo muryango. Ku kibazo c’uko umuhuza atohava ahengama kuko namwe ari muri uwo muryango w’abasilamu, umuvugizi w’umuhuza avuga ko nubwo hari uruhande rwa Kajandi rutemera cane ubwo buhuza, ko umuhuza Mohamed Rukara yabakiriye incuro zibiri zose baratanga n’intererano zabo. Umuhuza rero arashima intambwe ibiganiro bigezeko, akanemeza ko agiye kubandanya abahuza kandi ko yizeye ko iyo ntambwe azoyishikako.

Tubibutse ko ayo matati ahagaze ahanini ku burongozi bw’umuryango w’abisilamu mu Burundi, abegwa n’ayo matati basaba ko hosubirwamwo amategeko ngenderwako y’uwo muryango hamwe no gutumako inama rukokoma y’abagize uwo muryango mu Burundi, kugira bitorere indongozi za COMIBU (Communauté Islamique du Burundi)