Umukuru w’igihugu asaba abarundi kwuzuzanya mu gushigikira ubumwe bwabo

Mu gihe imyaka 24 irangiye abarundi bitoreye Ubumwe bwabo, umukuru w’igihugu Petero Nkurunziza asaba abarundi guhimbaza uwo munsi bivuye kumutima, mu gutsimbataza ubumwe.

Muri ivyo birori vyari vyitabwe n’abantu batandukanye, umukuru w’igihugu Petero Nkurunziza akaba yagarutse ku bihe bibi vyaranze Uburundi, ibihe vyatumye abantu isinzi bagandagurwa, abandi barangara, bitumwe n’ibura ry’ubumwe bw’abarundi, eka n’amacakubiri yari azingamitse abarundi. Petero Nkurunziza akaba yasavye abari bitavye ivyo birori bose, kudatamba ariko bazigiye mu mitima, nyabuna bigine uwo munsi bivuye ku mitima yabo, umwe wese aheze yuzuze mugenzi we aho ahobahoba.

Ku bwa Petero Nkurunziza rero, ubumwe bw’abarundi bwarondewe, bugiye kuzoshigikirwa n’umurwi wo kumenya ukuri no kunywanisha, aho yasavye abarundi bose co kimwe n’abanyamahanga bakunda Uburundi, kuwukunda no kuwushigikira, kuko ku bw’umukuru w’igihugu, uwo murwi ufise akazi kenshi.

Ku bwa Sylvestre Ntibantunganaya yahoze aronagoye Uburundi, akabona ko ubumwe bw’abarundi butagiye akagirire, kuko habaye zimwe mu ntambwe. Ntibantunganya, rero akavuga ko naho habaye vyinshi vyagiye biteranya abarundi baryana abandi bangara, vyagabanutse, agasaba ariko ko inzego zose kuja hamwe mu gufumbatira ubumwe.

Abanyagihugu rero bari bitavye ivyo birori, bamwe bakabona ko ubumwe buriho, abandi bakavuga ko ataburiho, mu gihe hari abicwa kakaba akamizwe n’ingoma, eka mbere n’itotezwa ryabadasangiye ivyiyumviro vya poritike n’abandi, ryarabandanije aravye abagiye baricwa n’abahunze igihugu, kuva mu mwaka w’2005 kugeza uwu munsi.