Umukuru w’igihugu yarishikiye kuraba ivyashitse kw’isoko nkuru ya Bujumbura

Mu gihe isanganya ry’umuriro ryadutse mw’isoko nkuru ya Bujumbura ryabaye umukuru w’igihugu ari mu rugendo, mu nama y’ishirahamwe ry’ubumwe bwa Afrika mu gihugu ca Ethiopie,amaze kuvyumva yaciye ahagarika urugendo rwiwe aratahuka mu gihugu ,akaba yaciye ashika ahabereye iryo sanganya.

Umuriro wadutse mu gitondo,ntiwari bwazime wose gushika ku mugoroba aho umukuru w’igihugu Pierre Nkurunziza, yashika ku kibuga c’indege ca Bujumbura.Aho ashikiye ,yavuze yuko uko abarundi bavyifashemwo vyerekana ko bashoboye kurengera ingorane,yaranamenyesheje kandi ko atari ubwa mbere u Burundi bugira ingorane ,ko bwaciye no mu bibazo bikomeye kuruta ivyo.

Igikenewe rero ngo ni uko abarundi boshira inguvu hamwe kugirango bashobore kurengera ivyabaye kandi bubakire hamwe igihigu.Ati:« Dutanguye urugendo rurerure kandi rurimwo ingorane nyinshi,ariko dushize inguvu hamwe,turashobora kuva muri bino bibazo.»

Umukuru w’igihiugu yarashimiye inzego z’igihugu ko bitanze kugira bashobore gutabara no kuzimya umuriro ahereye ku nzego z’igipolisi, n’igisirikare n’abategetsi batandukanye,n’abanyamigambwe bagumyeho kuva mu gitondo gushika ku mugoroba.

Pierre Nkurunziza kandi yarashimiye igihugu c’u Rwanda abicishije ku mukuru w’igihugu Paul Kagame,we yumvise ibihejeje kuba agaca asaba ko barungika indege ngo ize gufasha kuzimya.yaranashimiye abakuru b’ibihugu bari kumwe mu nama i Addis Abeba,ngo kuko bakiranye umubabaro ibihejeje gushikira u Burundi bakemera no gufasha.

Yamenyesheje kandi ko u Burundi buhahombeye vyinshi,ati ubutunzi bw’igihugu burahahombeye,ariko umukuru w’igihugu akaba yizeye ko ivyo abarundi batakaje muri iryo sanganya bashobora gusubira kubironka mu mwaka canke mu myaka ibiri.

foto:iwacu-burundi