Accueil > Inkino > volley-ball > Umurwi wa Muzinga wirahiye umurwi wa "Bujumbura Uwezo wa Ndani"
Umurwi wa Muzinga wirahiye umurwi wa "Bujumbura Uwezo wa Ndani"
lundi 10 Ruhuhuma 2014
Ishirahamwe ry’umupira w’amaboko ry’i Bujumbura, ryarahejeje inkino zogusobanura imirwi izokwitaba amahiganwa yo ku rwego rw’igihugu. Umurwi wa Muzinga watanye mu mitwe n’umurwi wegukira «Mairie ya Bujumbura».
Ku kibuga kiri mu bushikiranganji bw’urwaruka inkino n’imico kama, ku munsi w’ejo w’Imana harabaye urukino rwahuje umurwi wa Muzinga n’umurwi wegamiye «Mairie ya Bujumbura» Bujumbura Uwezo wa Ndani «B.U.N». Urwo rukino ntirwari rworoshe n’agato kuko amanota yagenda abangabanganye. Urukino rwagiye kurangira ku ntsinzi y’umurwi wa Muzinga. Itsinzi y’amanota 3 kuri 1 «3-1».
- Abkinyi ba Muzinga
Umumenyereza w’umurwi wa Muzinga, Niyongabo Epimac yamenyesheje n’umunezero mwinshi ko umurwi wa BUN (Bujumbura Uwezo wa Ndani) atari uwo guta mu nda nsa. Avuga ko baronse intsinzi bayikoreye. Epimac yatumenyesheje ko agiye guhindura umukenyuro kugira batsindire igikombe c’amahiganwa yo ku rwego rw’igihugu.
- Epimac amenyereza umurwi wa Muzinga
Ngendakumana Claver amenyeraza umurwi wa BUN, n’agashavu kenshi k’aho ahejeje gutsindwa, yabonye ko gutsindwa kw’umurwi wiwe ahanini kwavuye ku bari bahagarariye urukino «Arbitres». Avuga ati : "Aba arbitres bacu barakeneye guhabwa inyigisho kuko bakora ivyo batazi kandi bitera intege nke abakinyi." Naho biri uko, uwo mu menyereza avuga ko uko gutsindwa ata nkokora kumuciye kubera umurwi wiwe wamaze kuzotorwa mu mirwi 4 izoserukira igisagara ca Bujumbura mu mahiganwa yo ku rwego rw’igihugu.
- Claver amenyereza umurwi wa BUN
Icibonekeje mu kibuga n’uko iyo mirwi ata mwana yarimwo kandi rwari urukino rubereye ijisho. Ikindi naco, haribonekeje ukutumvikana hagati y’abaraba amakosa n’umumenyereza wa BUN aho wewe yabona ko batariko bandika ivy’ukuri.
Cherif Nkeshimana
