Umushikiranganji w’abakozi n’akazi yatangaje umunsi w’akaruhuko

Umunsi wo kwibuka umuhisi Cyprien Ntaryamira washizwe ku genekerezo rya 7 Ndamukiza, nk’uko bishikirizwa n’umushikiranganji w’abakozi n’akazi Annonciate Sendazirasa.

Guhera mu mwaka w’1994, uko umwaka utashe, igenekerezo rya gatandatu Ndamukiza, igihugu c’Uburundi cama cibuka urupfu rw’umuhisi Cyprien Ntaryamira. Ariko uno mwaka uwo munsi mukuru ukazohimbazwa igenekerezo rya 7 Ndamukiza, ku munsi wa mbere, kuko igenekerezo rya 6 rirwa ku munsi w’akaruhuko (ku munsi w’Imana). Umushikiranganji w’abakozi n’akazi Annonciate Sendazirasa, akaba yamenyesheje ko kuri uwo munsi wa mbere, ata bikorwa bihari kandi ko abakozi bazohemberwa uwo munsi w’akaruhuko kemewe n’amategeko.

Tubibutse ko umuhisi Cyprien Ntaryamira yitavye Imana biturutse kw’ikororwa ry’indege yarimwo mu gihugu c’Urwanda, ku kibuga c’indege i Kanombe, mu gisagara ca Kigali. Iryo sanganya rikaba ryahitanye kandi umukuru w’igihugu c’Urwanda Havyarimana Juvenal, hamwe na bamwe mu bashikiranganji b’Uburundi.

Cyprien Ntaryamira yamaze ku butegetsi amezi abiri gusa, kuva ku wa 5 Ruhuhuma, gushika kuwa 6 Ndamukiza 1994. Akaba yari yagiye ku butegetsi inyuma y’urupfu rw‘umukuru w’igihugu Ndadaye Melchior