Uwutwara sentare y’intango mu Rumonge yarahagaritswe

Mu ntara ya Bururi, komine Rumonge, mu bumanuko bw’Uburundi, igipolisi kidasanzwe kirwanya igiturire carahagaritse ku munsi wa kabiri, umukuru wa sentare y’intango kimwagiriza kurya igiturire.

Uwo mukuru wa sentare y’intango mu Rumonge yagirizwa kuba yarakiriye igiturire c’amafaranga ibihumbi mirongo irindwi y’amarundi, atanzwe n’umwe mubaburana, imbere y’uko urubanza rusomwa.

Abanyagihugu bo muri komine Rumonge banezerejwe n’iyo ngingo y’ihagarikwa ry’uwo mukuru wa sentare y’intango kuko kenshi hahora havugwa igiturire mu gisata c’ubutungane.

Angèle Barumpozako, umukuru w’igipolisi kidasanzwe kirwanya igiturire( Photo: iwacu-burundi.org )

Igipolisi kidasanzwe kirwanya igiturire ni urwego rwashizweho mu ntumbero yo gukurikirana iyubahirizwa ry’intwaro ibereye mu Burundi. Urwo rwego mu mirimo yarwo ya minsi yose rukorana na sentare irwanya igiturire.