Umuyobozi wa kaminuza y’Uburundi yagenye uwuserukira abanyeshure batamwumvikanyeko

Umuyobozi wa kaminuza y’Uburundi yarungikiye urwandiko umunyeshure amumenyesha ko amugenye guserukira hamwe no kurongora ishirahamwe rihurikiyemwo abanyeshure FER (Fraternité des Etudiants de RUMURI), naho batavyumvikanyeko na banyene guhabwa uwubaserukira.

Uwo yagenywe kurongora ishirahamwe ry’abanyeshure FER azwi kw’izina rya Ernest Nzambimana. Ikiringo ciwe co gutwara iryo shirahamwe yari yagisozereye kuwa 23 Mukakaro 2013, akaba ari nawe yari arongoye iryo shirahamwe mu mwaka w’ishure wa 2011 ushira uw’2012. Abanyeshure bo muri kaminuza y’Uburundi baramwiyamirije mu gihe yari ashaka kwitoza kugira aserukire abandi banyeshure. Muri ico gihe, amatora yahavuye ataba, abanyeshure bakaba baciye bamara amezi indwi badafise uwubaserukira kubera ingorane z’amoko yariko aravugwamwo muri ico gihe. Muri ico gihe nyene rero, umuyobozi wa kaminuza y’Uburundi Gaston Hakiza yari yamenyesheje ko atazokwigera yemeza umunyeshure n’umwe mu gihe cose abanyeshure bazoba bataritorera ababarongora.

Muri iryo kete Gaston Hakiza yandikiye uwo munyeshure Ernest Nzambimana, yamusavye ko yoshiraho abo bahora bakorana kugira babandanye baserukira iryo shirahamwe, ndetse ubwo buyobozi bukamwemerera ko buzomufata mu mugongo. Ubwo buyobozi bwagiriyeko bugabisha abo bose bogerageza guhungabanya umutekano ko bazohanwa bikomeye.

Ku ruhande rw’abanyeshure, bavuga ko iyo ngingo y’umuyobozi mukuru wa kaminuza y’Uburundi yerekana neza ko ubwo buyobozi bwivanga mu bikorwa vy’iryo shirahamwe ry’abanyeshure. Abanyeshure babona ko ivyo ari ibishaka gucanishamwo abanyeshure hamwe no kubasamaza kugira bibagire ivyo bariko barasaba nk’isubirwamwo ry’ivyerekeye agafashanyo abo banyeshure bahora baronka.

Mw’ikete abaserukira abandi banyeshure (les délegués généraux) muri kaminuza y’Uburundi banditse, bariyamiriza ingendo y’umuyobozi wa kaminuza y’Uburundi, bagasaba bagenzi babo gufatana mu nda ntibemere kujanwa na bamwe mu bayobozi bashaka gukoresha bamwe mu banyeshure kugira babacemwo imice. Bibutsa ko umuyobozi wa kaminuza ata bubasha na bumwe afise bwo gutora uwuserukira abanyeshure.

Tubibutse ko ugusubiza Ernest Nzambimana ku burongozi bwa FER bishitse mu gihe abanyeshure bari hamwe bose bariko basaba gusubiramwo ingingo zimwe zimwe ziriko zirafatwa muri iyo kaminuza ariko zitabashimisha na gato.