Afrika y’Epfo : Hateguwe ibirori vy’ukwibuka umwaka uheze Nelson Mandela asezeye isi

Umwaka urarangiye Nelson Mandela yahoze ari umukuru w’igihugu ca Afrika y’epfo asezeye isi. Ibirori vyo kwumwibuka bikaba vyatanguye kuri uno wa gatanu mu gicugu, mu gihugu ca Afrika Y’Epfo.

Ivyo birori vyatangujwe n’amasengesho hamwe n’imigirwa yabo, ku gasozi kamwe kaho i Pretoria kitiriwe abaharaniye umwidegemvyo mu gihe bariko barwanya intwaro za karyanishamiryango. Mw’ijambo ryiwe, umupfasoni wa Nelson Mandela, Grâca Machel agira ati : "Ndazi ko Madiba ari ahantu heza kandi atari wenyene, ivyo rero bikaba vyarashoboye kumbungabunga muri uno mwaka wose urangiye yitavye Imana."
Uwo mupfakazi abandanya avuga ko yagize amahirwe yo kuba ibitugu Nelson Mandela yishimikije mu bihe vyiwe bigoye, na cane cane ibihe vya nyuma vy’ubuzima bwiwe, ivyo rero akavuga ko azokwama avyibuka gushika ibihe bidashira, kubona yaratowe kugira abe uwo muntu yishimikizwa.

Ariko rero, n’ubwo muri ico gihugu bariko bahimbaza umwaka uheze Madiba yitavye Imana, umukuru w’igihugu ca Afrika y’Epfo, Jacob Zuma, ari mu rugendo rw’akazi mu gisagara ca Pékin.

Tubibuste Ko Nelson Mandela yari yavutse mu mwaka w’1918, akaba ariwe yabaye umukuru w’igihugu wa mbere w’umwirabure muri ico gihugu ca Afrika y’Epfo, akaba yitavye Imana kuwa 5 Kigarama 2013 i Johannesburg. Yahambwe ahitwa i Qunu, akarere asanzwe yarakuriyemwo, mu bumanuko bw’ico gihugu.