UPRONA : Komite nkuru yatowe mu 2009 yahamagaje inama

Komite nkuru y’umugambwe UPRONA yatowe mu mwaka w’2009 yahamagaje inama izoba kw’igenekerezo 11 Nzero 2015. Iyo nama bitegekanijwe ko izobera Ku Mugumya ikaba ari iyo gutora indongozi z’umugambwe UPRONA.

Nk’uko bishikirizwa na Tasiyano Sibomana, umuvugizi w’umugambwe UPRONA ishami ritemewe n’ubushikiranganji bw’intwaro yo hagati mu gihugu, komite nkuru y’umugambwe UPRONA yatowe mu 2009 yatumyeko iyo nama kubera Reta itunguruje urubanza yatsinzwe ruheruka gucibwa na sentare ya Afrika y’ubuseruko yahaye ububasha iyo komite nkuru bwo gutunganya umugambwe UPRONA.

Tasiyano SIBOMANA, umuvugizi w’umugambwe UPRONA, ishami ritemewe na Edouard NDUWIMANA

Ku ruhande rwa UPRONA ishami rirongowe na Conciliya Nibigira, bamenyesha ko iyo nama yatumweko ataco bayiziko. Gaston Sindimwo, umunyamabanga mukuru wa UPRONA yemewe n’ubushikiranganji bw’intwaro yo hagati mu gihugu, amenyesha ko bitumvikana ingene abo bagize komite nkuru botumako inama yo gushiraho indongozi kandi basanzwe barashizeho umushingamateka Karori Nditije nk’umukuru wabo, hamwe na Varisito Ngayimpenda nk’icegera ciwe.

Ku bijanye n’uko iyo nama yahamagajwe bitegekanijwe ko izobera ku Mugumya, Gaston Sindimwo amenyesha ko ingoro y’umugambwe UPRONA Ku Mugumya iberamwo inama n’ibikorwa vy’umugambwe UPRONA gusa, akavuga ko iyo iriko irategurwa mu mugambwe UPRONA batayizi.

Gaston Sindimwo, umunyamabanga mukuru w’umugambwe UPRONA urongowe na Concile Nibigira.