Urubanza rwa Ferederiko Bamvuginyumvira rwahawe irindi sango

Abagiriza Ferederiko Bamvuginyumvira ku vyaha akurikiranwako ntibashoboye kwitaba intahe yo kuri uwu wa mbere, nk’uko vyari bitegekanijwe. Sentare yaciye ifata ingingo yo kwungururiza urwo rubanza kuri rindi sango rya hafi.

Ferederiko Bamvuginyumvira, yahoze ari icegera ca mbere c’umukuru w’igihugu, akaba n’icegera c’umukuru w’umugambwe SAHWANYA FRODEBU akurikiranwako icaha co gushaka gutanga igiturire, inyuma y’aho yagirijwe ko yafatiwe mu nzu y’uburaro mu Kajaga, ari kumwe n’umupfasoni Joséphine Nzeyimana. Mu gihe vyari bitegekanijwe ko urwo rubanza rusubira gusasa kuri uwu wa mbere, abari kwagiriza Ferederiko Bamvuginyumvira ntibashoboye kwitaba. Sentare yaciye ishira urwo rubanza kuri uwu wa gatanu, kugira barindire ivyo vyabona vy’uwuserukira Reta mu rubanza.

Fabiyano Segatwa, umushingwamanza wa Ferederiko Bamvuginyumvira asaba ko ivyo vyabona vyorenguka, ukuri kukamenyekana, kuko icaha Ferederiko Bamvuginyumvira akurikiranwako ari irementanya ryo gushaka kumwaka agaciro.

Fabiyano Segatwa, aburanira Ferederiko Bamvuginyumvira

Kuva Ferederiko Bamvuginyumvira afatwa, mu mugambwe wiwe Sahwanya FRODEBU usanzwe uri muyitavuga rumwe n’ubutegetsi bw’Uburundi ubona ko ibiriko biramushikira ari irementanya ata kindi rigamije atari kumwaka iteka n’icubahiro, hamwe n’ukumwegeza kure kugira ntiyitegurire amatora yo mu mwaka w’2015. Kubwa Léonce Ngendakumana arongoye umugambwe Sahwanya FRODEBU, ni akamaramaza kubona umuntu afatwa agakorwako irementanya kandi ivyo ariko aragirizwa bitagira ivyemeza. Ababuranira Ferederiko Bamvuginyumvira bagasaba ko muri urwo rubanza rwo kuri uwu wa gatanu, ivyo vyabona vyorenguka bikishura ku bibazo vy’abacamanza, kugira urubanza rwa Ferederiko Bamvuginyumvira rushobore kuva mu nzira, akurweko ivyo yagirizwa.

Léonce Ngendakumana arongoye umugambwe SAHWANYA FRODEBU n’urunani ADC - Ikibiri