Uruzi rwa Ntahangwa ruguma rwiyagurira imbibe

Ama quartier amwe amwe yo mu gisagara ca Bujumbura arageramiwe n’inzuzi, aho amazu amwe amwe ari mu kubomoka uruzi rwa Ntahangwa.

Uruzi rwa Ntahangwa rurageramiye quartier ya Mutanga Sud iri muri komine ya Rohero, co kimwe na komine Nyakabiga, aho amazu amwe amwe ageramiwe n’urwo ruzi, ibarabara ryitiriwe uwa 28 Munyonyonyo hamwe n’ishure ritoya rya Mutanga Sud. Urwo ruzi rusanzwe ruca mu makomine atandukanye y’igisagara ca Bujumbura, rukaba ruguma rwiyagurira imbibe, ivyo navyo bigatuma amazu hamwe n’ibindi bica bigira ingorane, na rirya amwe mu mazu uyasanga ku nkombe yarwo.

Bamwe mu banyagihugu baba mu makomine ya Nyakabiga na Rohero baba ku nkengera z’urwo ruzi, bakavuga ko rubageramiye, kandi bateye n’akamo kugira ababishoboye bose bakore ibishoboka babakingire, urwo ruzi rutariha inkumbi.