Yaciriwe urubanza rwo gupfungwa ubuzima bwiwe bwose

Mu mpera z’indwi twaraye dusozereye, mu ntara ya Kayanza, sentare nkuru muri iyo ntara, irongowe na Prime Mbarubukeye yaraciriye urubanza rwo gupfungwa ubuzima bwiwe bwose, Eugénie Mbabarempore yagiriwe n’icaha co kugandagura inabukwe wiwe.

Eugénie Mbabarempore akaba aturuka ku musozi Gahisi, komine Butaganzwa, intara ya Kayanza. Yagiriwe n’icaha co kugandagura avyishakiye inabukwe wiwe akoresheje ubuhiri, hakaba hari ku musi wa kane igenekerezo rya 13 Ruheshi 2013. Abo bakenyezi uko ari babiri bakaba bari bamaze umwanya utari muto babana bo nyene, inyuma yo guhebwa n’abagabo b’abo bompi.

Mukaba mwomenya ko umusi uwo mukenyezi yakwa ubuzima, bari mu matati mu muryango, ari naho Eugénie Mbabarempore yaca arengera kuri inabukwe akamukubita ubuhiri.