Inzuzi zica mu gisagara ca Bujumbura ntizikingiwe

Uruzi rwa Kanyosha co kimwe na zimwe mu nzuzi zica mu gisagara ca Bujumbura bamwe bazifata nk’urukiza kuri bo, abandi nabo bakazifata nk’ikibanza co gutmwo imyanda itandukanye.

Yaba abazimbamwo amabuye canke imisenyi, eka mbere no guta imyanda muri izo nzuzi, ni kimwe mu bihungabanya ibidukikije. Uruzi rwa Kanyosha co kimwe n’izindi nzuzi, zikaba zigeramiwe n’abo bazimbamwo bimwe mu vyo gukoresha kwubaka amazu, n’abazitamwo ibisigarira vy’ivyo bafunguye, n’amayarara atandukanye.

Abatandukanye mu banyagihugu baba hafi y’izo nzuzi, bakaba bemeza ko bamwe zibatunze na cane cane abaziroporamwo amabuye n’umusenyi, abo mbere bakavuga ko iyo hataba izo nzuzi bataba bashobora kugaburira imiryango yabo.