Icegeranyo ca SOS-Torture kivuga abantu 8 bishwe

Icegeranyo ca SOS-Torture Burundi co mu ndwi yo kuva kuwa 18 gushika kuwa 25 Ntwarante 2017 cagarutse ku bantu bagera ku munani bishwe, muribo hakaba harimwo intwazangabo yo mu giporisi c’Uburundi yatowe ikiziga hafi y’isengero ryitiriwe umweranda Yozefu mu Ngagara.

Ishirahamwe SOS-Torture Burundi rivuga ko iyicwa ry’iyo ntwazangabo ryaje kwongereza igitigiri c’abasirikare n’abaporisi bo ku rwego rwo hejuru babandanya kwicwa, benshi muribo bakaba ari abatutsi nk’uo bivugwa na SOS-Torture Burundi.

Ico cegeranyo ca SOS-Torture Burundi kigaruka kandi ku bantu bagera kuri batandatu bahagaritswe amategeko atubahirijwe, muri ico kiringo c’indwi imwe, mu mihingo itandukanye y’igihugu c’Uburundi. Muri abo bahagaritswe, SOS-Torture Burundi ivuga abasore babiri bahagaritswe n’urwaruka rw’imbonerakure za CNDD FDD muri komine Rugombo, intara ya Cibitoke, hakavugwa n’uwundi mugabo yakubiswe n’izo mbonerakure za CNDD FDD, muri komine Gisuru, intara ya Ruyigi.

Ishirahamwe SOS-Torture rivuga kandi abanyororo umunani b’umugambwe MSD utavuga rumwe n’ubutegetsi bw’umukuru w’igihugu NKURUNZIZA, bagumijwe mw’ibohero, kandi bari mu bagiriwe ikigongwe n’umukuru w’igihugu c’Uburundi kuva mu kwezi kwa Nzero 2017.