Abashikiranganji babiri bajejwe umutekano batumiwe mu nama nshingamateka

Mu ngoro y’amakoraniro mu Kigobe, abo bashikiranganji bompi babanza gukurikira icegeranyo cakozwe n’umurwi wamaho mu nama nshingamateka ujejwe umutekano n’ukwivuna abansi, kivuga umutekano w’Uburundi ingene wifashe.

Inyuma y’ugukurikirana ico cegeranyo, abo bashikiranganji bishura ku bibazo bitandukanye vy’abashingamateka.

Ivyavugiwe mu ngoro y’amakoraniro mu Kigobe, hamwe n’ibiri muri ico cegeranyo c’abashingamateka, turabigarukako mu makuru yacu yo hanyuma.

Alain Guillaume BUNYONI ari kumwe na Emmanuel NTAHOMVUKIYE mu nama nshingamateka

Tubibutse ariko ko umushikiranganji w’umutekano Alain Guillaume BUNYONI asanzwe ari mu batumiwe mu nama nshingamateka yamenyesheje kuri uwu wa mbere ko muri rusangi mu biharuro bafise, basanga ubugizi bwa nabi bwagabanutse, bagereranije n’amazi atatu ya mbere y’umwaka w’2017. Nk’uko vyashikirijwe n’umushikiranganji Alain Guillaume BUNYONI, ivyo biharuro vyavuye ku ncuro 1331 mu gice ca mbere c’umwaka, bija ku ncuro 901 muri iki gice ca kabiri c’umwaka, ni ukuvuga ko ubugizi bwa nabi mu Burundi bwagabanutse ku bice 32,3 kw’ijana.