BNUB yaneguye ingingo Reta y’Uburundi yihutiye gufata

Mu buserukizi bw’ishirahamwe mpuzamakungu ONU mu Burundi bamenyesha ko ivyashikiye umukozi wabo Abednego Mutua agafatanwa amasasu ku kibuga c’indege ca Bujumbura ari isanganya ryatumwe n’ukwibagira. Muri BNUB bavuga ko Reta y’Uburundi itari kwihutira kumwirukana, kuko ico kibazo impande zompi zari kugitorera inyishu zisunze amasezerano ahuza ONU n’Uburundi.

Mu rwandiko rwasohowe n’ubuserukizi bw’ishirahamwe mpuzamakungu ONU mu Burundi, umuvugizi wa BNUB, Vladimir Monteiro yibutsa ko Abednego Mutua yahora ajejwe umutekano wa hafi (Sécurité rapprochée) wa Parfait Onanga Anyanga arekuriwe kugendana ibirwanisho, kuko n’amasezerano hagati y’Uburundi na ONU yo kuwa 28 Kigarama 2011, mu gace kayo ka 36, arekurira Abednego Mutua, nk’umuhinga muvy’umutekano, kugendana ibirwanisho.

Mu buserukizi bw’ishirahamwe mpuzamakungu ONU mu Burundi (BNUB) barabeshuza ivyo Reta y’Uburundi yamenyesheje ko Abednego Mutua yafatanwe ikirwanisho, kandi yari afise amasasu gusa yibagiriye mu bintu yari atwaye mu karuhuko yari agiyemwo mu gihugu ca Kenya asanzwe avukamwo, nk’uko mbere nawe nyene yavyiyemereye mu rupapuro rwemeza ivyo yari ahejeje gufatanwa (procès verbal) yateyeko umukono. Nk’uko Vladimir Monteiro umuvugizi wa BNUB abimenyesha, kuba Abednego Mutua yaribagiriye ayo masasu mu bintu yari afise, ntivyari bikwiranye n’uko muri Reta bari guca banyarukira kumwirukana, bakamenyesha ko hari izindi nzira zari gukoreshwa zijanye n’amasezerano Uburundi bwagiranye n’ishirahamwe mpuzamakungu ONU.

Vladimir Monteiro, umuvugizi wa BNUB

Ubuserukizi bw’ishirahamwe mpuzamakungu ONU mu Burundi bumenyesha ko mu kwirukana uwo mukozi, Reta yahonyanze amasezerano y’i Vienne ajanye n’imigenderanire, kuko iyo ngingo y’ukwirukana (Doctrine de persona non grata) ikoreshwa ku bakozi ba ONU baba barungitswe n’ibihugu vyabo mu yandi ma Reta, ariko itigera ikoreshwa ku bahinga canke abandi nk’abajejwe umutekano.

Muri ubwo buserukizi bwa ONU mu Burundi basaba ubushikiranganji bw’imigenderanire y’Uburundi n’ayandi makungu ko bwokura ico gihano c’ukwirukanwa kuri uwo mukozi yahora ajejwe umutekano wa hafi (Sécurité rapprochée) wa Parfait Onanga Anyanga, gutyo akurikiranwe hisunzwe izindi ngingo ziri mu masezerano ahuza ONU n’Uburundi.