Burundi : Ikigo kijejwe guhingura no gushingura ibivuye mu vyimburwa kigiye kwubakwa

Mu mubonano , umukuru w’igihugu c’uburundi yagiranye na mugenzi we arongoye igihugu c’ubushinwa , ico gihugu cemeye ko kigiye kuwbaka ikigo kijejwe guhingura no kubika ivyimburwa hamwe no gutanga imfashanyo izofasha mu matora.

Umukuru w’igihugu c’Uburundi Petero Nkurunziza akaba yabonanye na Xi Jinping arongoye igihugu c’Ubushinwa, mugenzi we arongoye igihugu c’ubushinwa aho baganiriye ahanini ku vyerekeye aho imigenderanire y’ivyo bihugu uko ari bibiri igeze ndetse no mu gisata c’indero n’ubuhinga. Umukuru w’igihugu c’ubushinwa yaciye yemere kwongereza igitigiri c’abanyeshure b’abarundi baja kwiga muri ico gihugu bava kuri 35 baja ku mirongo itanu buri mwaka. Ico gihugu kandi cemereye umukuru w’igihugu c’Uburundi Petero Nkurunziza ko kigiye kwubaka ikigo co guhingura hamwe no kubika ivyimburwa.

Umuvugizi w’umukuru w’igihugu c’ Uburundi Léonidas Hatungimana ari nawe yatanze iyo nkuru, amenyesha ko Ubushinwa bwemeye kandi kwubaka urugomero rw’umuyagankuba ku ruzi Ruzibazi kandi ko igihugu c’Ubushinwa kizoshigikira amatora yo mu mwaka w’2015, mu gutanga imfashanyo ingana umuriyaridi w’amafranga y’amarundi.

Hejuru y’iyo mfashanyo kandi igihugu c’ubushinwa kizotanga imfashanyo yindi ingana imiriyaridi 10 z’amarundi.