FOCODE : Imyiyerekano yo gushigikira amahoro yahindutse gutuka bamwe

Imyiyerekano yari yatumweko ku wa 28 Ruhuhuma na Reta y’Uburundi mu ntumbero yo gushigikira amahoro, yahindutse gutyoza amashirahamwe ataho yegamiye mu vya poritike n’amwe mu maradiyo nk’uko bivugwa n’icegera c’umukuru w’ishirahamwe FOCODE.

Mu kiganiro ku banditsi n’abamenyeshamakuru, Denis Ndayishemeza icegera c’umukuru w’ishirahamwe FOCODE, avuga ko baguye mu gahundwe bumvise amajambo yo gutuka amwe mu maradiyo, amashirahamwe ataho yegamiye mu vya poritike eka n’izina rya Pacifique Nininahazwe arongoye FOCODE rikaba ritasigaye inyuma mu gutyozwa, imbere y’abasitanteri, ba buramatari n’abaserukira Reta nk’abashikiranganji n’abandi muri iyo myiyerekano.

Denis Ndayishemeza, icegera c’umukuru w’ishirahamwe FOCODE

Ishirahamwe FOCODE rero rikaba ritangazwa rwose n’ingene Reta yotumako imyiyerekano yo gushigikira amahoro, mu nyuma bamwe mu banyagihugu bakifatirwa mu gahanga ku mugaragaro. Iryo shirahamwe rikibutsa ko ryo, c kimwe n’ayandi mashirahamwe eka n’amwe mu maradiyo, yemerewe gukorera ku mugaragaro, hisunzwe amategeko, kandi akaba akora yisunze amategeko. Icegera c’umukuru w’iryo shirahamwe akavuga ko yaba imvyino zo gutuka ayo mashirahamwe n’amaradiyo, canke amajambo yavugwa n’abitavye iyo myiyerekano yo kubatuka na cane cane umukuru wa FOCODE, ari umugambi wo kubambika iceyi n’ukubaburagiza inyuma y’igitero cabereye muri komine ya Murwi mu ntara ya Cibitoke, ivyo mbere bakabona ko bigamije kuzobata muri yompi eka n’ukuzimanganirizwa ubuzima bigashobora gushika.

Muri FOCODE bakabona ko bimwe muri ivyo, hinyegeje inyuma kubasamaza hamwe n’ayandi mashirahamwe eka n’abanyagihugu, kugira urugamba batanguye rwo kumenyesha ko batazigera bemerera umukuru w’igihugu Petero Nkurunziza kwitoza ubugira gatatu bidaciye mu mategeko babihebe.