Gabriel Rufyiri : "Abakora mu biro vy’umukuru w’igihugu bariko barya amagi ya Gwungere"

Umukuru w’ishirahamwe OLUCOME Gabriel Rufyiri asaba Reta kudakoresha imvugo ifobetse, nyabuna itange umuco kuhavuye indege iherutse guhabwa Uburundi n’abavuzwe ko ari abakunzi b’Uburundi, kugira ize irerure umukuru w’igihugu.

Mu kiganiro yahaye abamenyeshamakuru kuri uno wa 15 Gitugutu, Gabriel Rufyiri akaba yavuze ko indege yaje kugira izorerure umukuru w’igihugu Petero Nkurunziza hakenewe ko ukuri kuja ahabona hakamenyekana abayitanze abo aribo, kuko uwo mukuru w’iryo shirahamwe ryishinze kurwanya abanyuruza amatungo ya Reta yibaza ko ishobora kuba yaje nk’igiturire mw’iyimbwa ry’ubutare bwa Nickel bw’i Musongati.

Gabriel Rufyiri akaba avuga ko yagerageje kubaza abakora mu biro vy’umukuru w’igihugu kugira basigurire neza abarundi n’amakungu amamuko y’iyo ndege, ariko akavuga ko bamwishuye ko abagenzi b’Uburundi batanze ibice 80 kw’ijana, Uburundi nabwo butanga 20 kw’ijana. Ariko umukuru w’iryo shirahamwe akagira amakenga mu gihe iyo Uburundi buronse ingabire z’imfashanyo z’ibindi bihugu hama hahamagarwa abaza kuraba uko haterwako ibikumu ku masezerano, ariko kuvy’iyo ndege, akaba atawahamagawe.

Rufyiri Gabriel akaba avuga ko yaranasavye ko bomwereka aho amafaranga y’ivyo bice 20 kw’ijana yavuye ariko ntibahamwereka. Rufyiri ariko akibaza ko, uko bigenda kwose amwe mu mahera akurwa kuri compte iri muri BRB nomero 1101/001.17 yitwa appui aux bonnes initiatives, ikurikiranwa na Allain Guillaume Bunyoni umuhanuzi w’umukuru w’igihugu, afashanije n’uwitwa Jean Paul nawe ari mu bahanuzi b’umukuru w’igihugu, yoba ariyo agaruka agafasha muri ivyo bikorwa abandi bakora mu biro vy’umukuru w’igihugu badashobora gutangira insiguro. Abo babiri OLUCOME ikamenyesha ko aribo jisho ry’umukuru w’igihugu mw’itunganywa ry’iyo compte yoba ijako ku mwaka ku mwaka imiriyaridi zigera kuri 5.

Umukuru wa OLUCOME rero akavuga ko abarundi n’amakungu bakwiye kuhagabira na cane cane mw’iyimbwa ry’Ubutare bw’i Musongati, kuko ata guhamagara abaza kw’imba vyakozwe ku mugaragaro, ahubwo vyakorewe mu gifuri, kandi ibiro vy’umukuru w’igihugu bibifisemwo uruhara. Amenyesha ko mu biro vy’umukuru w’igihugu bariko barya amagi ya Gwungere, kuko ivyo bintu bitazoherera aho, narirya iryo shirahamwe rimaze kwandikira amakete menshi umukuru w’igihugu ryerekana amanyanga adasanzwe akorwa haba mu masoko atangwa mu kinyegero eka n’ibindi.

Umukuru w’iryo shirahamwe rero akaba asaba amashirahamwe akorera mu Burundi hamwe n’abashingamateka kutarera amaboko, kuko hari akarwi k’abantu bake bariko bapfukama igihugu mu nda bakabandanya batunga, n’ayo umunyagihugu muto agowe, ikigoyi kimurembeje.