Ikigo Maison Shalom cahimbaje imyaka 20 kibayeho

Ikigo Shalom caraye gihimbaje imyaka 20 kimaze kibayeho. Abagiye barafata amajambo bose bagiye baragaruka ko abarundi boharanira urukundo n’amahoro, bagatsinda ikibi, n’abanyepolitike ko bokworinda gusuka urwaruka mu ndyane.

Mu kigo Shalom ku munsi wa kane igenekerezo rya 31 gitugutu 2013 kari akanyamuneza ntangere kuko bari baramutse bigina imyaka 20 iheze ico kigo kivutse. Umupfasoni Margarita Barankitse, mw’ijambo ryiwe yamenyesheje ko ari akanyamuneza ntangere kuko ivyakozwe ari intsnizi y’urukundo ku kibi. Yasavye abanyepolitike b’abarundi gushira imbere amahoro, bareke gusuka urwaruka mu ntureka, kandi ata n’umwe ayobewe amabi yakozwe muri kahise k’Uburundi.
Abana barerewe muri ico kigo basavye Reta gukora uko ishoboye kwose kugira itorere inyishu ikibazo c’abana basegerereza mw’ibarabara.

Icegera ca kabiri c’umukuru w’igihugu, Gervais Rufyikiri yari yateye iteka ivyo birori mw’ijambo ryiwe nawe yasavye abarundi gusubiza amaso inyuma muri kahise k’Uburundi, barabe ingene bisamburiyeko, batorere umuti indyane zabaye, bashire amahoro imbere ya vyose.

Icegera ca kabiri c’umukuru w’igihugu Gervais Rufyikiri ( i bubamfu), ari kumwe n’umupfasoni Maragarita Barankitse ( i buryo)

Mwomenya ko ikigo Maison shalom catangujwe n’umupfasoni Maragarita BARANKITSE, kikaba catanguye ibikorwa vyaco mu mwaka w’1993, inyuma y’igandagurwa ry’umukuru w’igihugu Melchior Ndadaye, hamwe n’ubwicanyi butagira izina bwahitanye abantu ibihumbi n’ibihumbi. Ico kigo Maison Shalom caciye ciha intumbero ryo gufasha abana ba ntahonikora no kurwanira agateka k’abana, yaba impfuvyi za Sida, abana bo mw’ibarabara, n’inzoya ziri mu mabohero. Kuva ico kigo gishingwa kuva mu mwaka w’1993, kimaze gufasha abana bashika ku 20000 b’impfuvyi, hamwe n’abandi ba ntahonikora. Ico kigo gisanzwe gikora n’ibindi bikorwa bitari bike nk’uguharanira agateka k’abana, igisata c’indero, amagara y’abantu n’ibindi bikorwa vyo kurwiza ubutunzi.