Kamenge : Akarwi k’abasore bakorana n’igiporisi kagirizwa gukubagura abanyagihugu

Abantu bagera ku 200 bavuga ko batagira aho bakika umusaya inyuma y’aho birukaniwe ku Mase aho bari basanzwe baba haraciye iminsi itari mike. Abaporisi bafashanije n’akarwi ka bamwe mu misore bakaba babakubita, nk’uko abo banyagihugu bavyivugira.

Umwe muri abo birukanywe ku Mase, akaba yabariye ikinyamakuru IGIHE ko atagira aho akika umusaya. Uretse ko uwo mukenyezi yayagiye ikinyamakuru IGIHE ko ari umupfakazi, amenyesha ko n’abana biwe ubu batagira aho baba, batse indaro mu mihana y’abagiraneza. Uwo mupfasoni yanse ko tumuvuga izina ku bw’umutekano wiwe, akaba yavuze ko abaporisi n’abandi basoresore bavuga ko bafasha gucungera umutekano babakubita, bakababuragiza aho bababonye.

Amwe mu mazina avugwa cane kuba ari mu babangamiye abo banyagihugu, akaba ari nk’uwitwa Ndikumana Renovat, Disimasi, Jean Marie na Issa. Abo bakaba bagirizwa gukorana na bamwe mu baporisi, mu ruhigi rw’abanyagihugu bataronkejwe aho bubaka uduhema mu Carama, inyuma yaho birukaniwe ku Mase. Batangazwa n’uko abajejwe gukingira umunyagihugu aribo bagaruka bakabakubagura. Basaba ko hatoba nyagupfa na nyagukira, ko bose boronswa aho baba n’imiryango yabo, nayo igiporisi kigakingira bose, atakubirukako nk’abakozi b’ikibi.

Baremeza ko bamaze kwitura umuhuza w’abarundi. Ariko ikibazo cabo kikaba n’ubu ata muti barakironkera, kuko bahorabaja kwishuza, ariko ntibaronke inyishu ihumuriza. Mwomenya ko kuri rusasuma yari yakozwe, bari babonye ko abari bakeneye kuronswa ibibanza babamwo bari 507, haca haronka 307, nayo amajana abiri, ubu bakaba batagira iyo baba.