Accueil > Amakuru > u Burundi > Uwahora aserukira igihugu c’Ubuyapani yahejeje ikiringo ciwe
Uwahora aserukira igihugu c’Ubuyapani yahejeje ikiringo ciwe
lundi 22 Mukakaro 2013
Umukuru w’igihugu Petero Nkurunziza yahaye umubonano uwahora aserukira igihugu c’Ubuyapani, Takata Toshihisa, afise icicaro mu gisagara ca Nairobi. Mu gihe ikiringo ciwe caheze, Takata Toshihisa yari aje gusezera umukuru w’igihugu Petero Nkurunziza.
Petero Nkurunziza yamenyesheje ko ashimishwa n’imigenderanire myiza iri hagati y’Uburundi n’Ubuyapani, ivyo bikagaragarira mu migambi Ubuyapani bwaranguye mu Burundi nk’inyubakwa zitari nke.
Ku ruhande rwiwe, Takata Toshihisa yiyemeje ko igihugu c’Ubuyapani kizobandanya gushigikira iterambere ry’Uburundi. Nk’uko bavyemeye mu nama yabereye i Genève yahuje abafasha Uburundi, Ubuyapani ntibuzohengesha gushigikira Uburundi.
Takata Toshihisa yahora aserukira igihugu c’Ubuyapani mu Burundi yaciye aboneraho akaryo ko kumenyesha ko umukuru w’ishirahamwe ry’umupira w’amaguru ryo mu gihugu c’Ubuyapani azogendera Uburundi, akazoba azaniye ishirahamwe ry’umupira w’amaguru mu Burundi imfashanyo y’imipira n’ibirato vyo gukinisha.
Takata Toshihisa yarangije ikiringo ciwe yari amaze imyaka itatu mu mabanga yo guserukira igihugu c’Ubuyapani mu Burundi.
Egide Nduwimana