Ishirahamwe CAFOB riragaya inyifato y’abapolisi bamwe bamwe

Ihuriro ry’amashirahamwe y’abakenyezi,ishirahamwe ataho ryegamiye,CAFOB riragaya inyifato y’abapolisi bakubise kuri uyu wa gatanu uheze abakenyezi bariko badandaza ivyashara vyabo ku mabarabara ari ngaha mu gisagara ca Bujumbura.

Umwe mu bakenyezi bakubiswe ari mu bitaro vyitiriwe Prince Regent Charles.Cafob imenyesha ko ahanini abo bakenyezi ari abapfakazi,banyenurugo kandi ko benshi ari abacitse amaboko babuze ivyabo k’umuriro wahitanye isoko nkuru ya Bujumbura.

Iryo huriro ry’amashirahamwe rihamagarira abategetsi gushigikira no gukingira abo bakenyezi mu mirimo yabo ya minsi yose na cane cane mu bikorwa vyo kwubaka isoko yategekanijwe bitarahera.

CAFOB isaba ahubwo gusubiza ibidandazwa vyari vyanyazwe banyenevyo no gushumbusha ababuze ivyabo.Yongera isaba Leta kuvuza abahuye n’iryo totezwa no guhana abagirizwa ayo mabi yose yakozwe.