UPRONA : Impande zibiri zishamiranye zose mw’isiganwa ry’amatora

Mu gihe amatora mu Burundi yegereje, amashami yose y’umigambwe UPRONA ariko arayitegurira yaba iyagiriza umugambwe CNDD FDD ko ariyo yabaciriye ubunywenywe umugambwe canke uwagirizwa ko ukorana n’ubutegetsi.

Abari bitavye ikoraniro ry’umugambwe UPRONA ryo kuri uyu wa 11 Nzero, abagize komite nkuru y’uwo mugambwe yatowe mu mwaka w’2009, bakaba bamenyesheje ko bagiye kwitegurira amatora, mbere baca basaba abo basubiye gushira imbere aribo umushingamateka Karori Nditije hamwe n’umwigisha muri za kaminuza Evariste ko batosubira gusamazwa n’abo bavuga ko bari mu kwaha kwa CNDD FDD, canke umurwi uvuga ko ataho wegamiye, uwo nawo bikavugwa ko urimwo Niyoyankana Bonaventure, Therence Sinunguruza, Potien Niyongabo, Martin Nduwimana n’abandi.
Basaba abarongozi babo ko bogendera Abadasigana bose, mbere bagakomeza imigenderanire hamwe n’iyindi migambwe yose yipfuza guhindura ibintu mu gihugu.

Eka no muri UPRONA yemewe n’ubutegetsi bakavuga ko bariko bitegurira neza amatora. Gaston Sindimwo umwe mu bategetsi b’iryo baba ry’umugambwe wa Rwagasore akaba yavuze ko ku mutumba ku mutumba bariko barashiraho inzego zizotuma bitegurira amatora.