Accueil > Amakuru > Mu makungu > Amerika : Umuganga yemeje ko umukuru w’igihugu ata ngorane yo mu mutwe (...)
Amerika : Umuganga yemeje ko umukuru w’igihugu ata ngorane yo mu mutwe afise
mercredi 17 janvier 2018
Ronny Jackson yavuze kur’uyu wa kabiri igenekerezo rya 16 Nzero 2018,ko umukuru w’igihugu Donald Trump afise amagara meza, kandi ko ata bwoba afise ku biraba uko mu mutwe w’umukuru w’igihugu hifashe.
Amakuru dukesha iradiyo y’abongereza BBC, amenyesha ko mu ndwi iheze, abaganga bagiriye ibipimo umukuru w’igihugu mu kiringo c’amasaha atatu, ku ncuro ya mbere kuva abaye umukuru w’igihugu ca Amerika.
Muganga Ronny Jackson yabwiye abamenyeshamakuru ko muri rusangi amagara y’umukuru w’igihugu yifashe neza, kandi ko abandanya kugira umutima umeze neza kandi muri rusangi amagara yifashe neza kubera atanywa itabi n’inzoga
BBC ivuga ko, umuganga wa Donald Trump yavuze ko umukuru w’igihugu ubu afise imyaka 71, akeneye kugabanya gufungura infungurwa zirimwo amavuta no gukora imyimenyerezo ngororamubiri.
Ibi bibaye inyuma y’igitabo Fire and Fury canditswe giteye amakenga kivuga ku burwayi bwo mu mutwe bw’umukuru w’igihugu Donald Trump.
Umukuru w’igihugu Donald Trump yishuye avuga ko ico gitabo kirimwo ububeshi, mu gihe umushikiranganji w’imigenderanire yahakanye ivyo vyanditswe ku magara y’umukuru w’igihugu.
MUGISHA Van Naris
