Urwanda: Umushikiranganji wa mbere w’Ubuhindi ari mu rugendo murico gihugu

Umushikiranganji wa mbere w’igihugu c’ubuhindi Narendra Modi yakiriwe i Kigali kuruno wa kabiri igenekerezo rya 24 Mukakaro 2018,n’umukuru w’igihugu c’Urwanda Paul KAGAME ,mu rugendo arimwo murico gihugu rw’imisi ibiri.

Uyo mushikiranganji wa mbere w’Ubuhindi Narendra Modi atunganije urugendo mu Rwanda inyuma yaho umukuru w’igihugu c’Ubushinwa ahejeje urugendo rwiwe rw’imisi ibiri aho mu gihugu c’Urwanda nyene.

Narendra Modi abaye umushikiranganji wa mbere w’Ubuhindi agendeye igihugu c’Urwanda intumbero y’urwo rugendo akaba ari ugukomeza umubano hamwe n’imigenderanire hagati y’Ubuhundi n’Urwanda.

Bitegekanijwe ko Narendra Modi azokwitaba inama y’ihuriro y’abagwizatunga b’Urwanda na bo mu gihugu c’Ubuhindi yongere atange inka zishika 200 mu karere ka Bugesera mu ntumbero yo gushigikira umugambi wiswe“Girinka.”

Imigenderanire hagati y’Urwanda n’igihugu c’Ubuhindi watanguye mu mwaka w’i 1999, aho ku murwa mukuru New Delhi Urwanda rwashizeho ibiro vy’uwugiserukira.

Abahindi baba mu gihugu c’Urwanda bangana ibihumbi 3, benshi muribo bakaba bakora ibikorwa vy’ubudandaji nko kudandaza ibikoresho bikoreshwa mu buhinga bwa none n’ibindi.