Moyes yatanguye akazi kiwe muri Man United

Umumenyereza mushasha wa Manchester United David Moyes, yavuze ko yiteguriye gufasha umurwi yahora amenyereza wa Everton kuronka umumenyereza yomusubirira mu gihe yoba abisabwe.

Moyes yamaze imyaka 11 muri Everton. Ni umwe mu bamenyereza bari baramvye mu mirwi imwe yo mu Bwongereza, akaba avuga ko vyamugoye cane gufata icemezo co kugenda.

Uyo mumenyereza w’imyaka 50 y’amavuko, niwe yazanye abakinyi hafi ya bose Everton ifise muri iki gihe. N’aho yashitse ku kibuga ca Manchester United, akazi nyako kazotangura kw’igenekerezo rya mbere z’ukwezi kwa Mukakaro uyu mwaka 2013.

Moyes avuga ko umwitwarariko wiwe wa mbere yihaye ari ugusaba umukinyi Wayne Rooney kuguma muri Manchester United n’aho yamaze gusaba ko yokwemererwa akaja gukina ahandi.