Abaririmvyi Yoya na R Flow baviriye hasi urukundo rurembejwe n’insaku n’amaronko

Ururirimbo "Ibuka" rw’umuririmvyi R. Flow rufise amajambo nkoramutima cane cane ku bahemuka kw’isezerano ry’urukundo. R. Flow ati : "Ibuka". Urwo rurimbo rufise ubutumwa bushusha n’uburi mu ruririmbo "IBIGAMBO" rwa Yoya rwasohotse vuba. Abo baririmvyi baviriye hasi urukundo rurembejwe n’insaku n’amaronko .

"Ibuka" ko wahora umbwira ko ari jewe gusa yokugeza aho ushaka, none se?". Iryo ni rimwe mw’ijambo rigize urwo ruririmbo. Arongera ati:" Yaco ukangwa n’ibihinda ataco bimaze, menya ko inyuma y’inyungu haza ukwicuza". R. Flow ageze ku citabirizo aririmba ahanura avuga ati : "Ntukajane n’ivyisi kuko atavyo womara, reka kwiyamamaza. Nimba ubu bicaka haraho vyonaca ingese".

R. Flow amenyesha ko iyo intumbero y’ururirimbo "Ibuka" ari ugukebura abakundana ariko bagateranywa n’amaronko kandi bishobora guhinduka, uwahemutse bose bakamuherako, akipfuza n’uwo yahevye. Ati : "Nimba ubu bicaka haraho vyonaca ingese". Kubera amajambo arimwo n’akamaro ifitiye abantu bose bari mu rukundo, R Flow atumenyesha ko isanamu yarwo igiye gukorwa vuba cane, izokorwa n’umuhinyanyuzi karuhariwe Black Arthur wo muri "Akaga Videoz".

Ururirimbo "Ibuka" ruje rwiyongera ku rundi "Ibigambo" rwa Yoya rukebura abatandukanywa n’urusaku. Yoya nawe ati :" Nshaka kumenya nimba unyizera canke wizera ivyo baza bakubwira...urusaku baza bakubwira".Urwo twararubashikirije kuri uuwu wa gatatu. Dufatiye kuri izo ndirimbo 2, biboneka ko abo baririmvyi bariko bagerageza guhanura abo bantu bari mu rukundo cane cane ingo z’ubu zisamburwa n’amaronko canke insaku.

Tubamenyeshe ko R. Flow ari kumwe na Patient na Bamson bakoreye hamwe ururirimbo bise "pesa" canke "Amahera" mu Kirundi, urwo rugiye gusohoka vuba.

Umviriza ururirimbo "Ibuka" rwa R. Flow

Umviriza kandi "Ibigambo" rwa Yoya