Abadandaza amakara basabwa kuvuga ababatangisha igiturire

Umukuru w’igipolisi kijejwe kugenzura uruja n’uruza mu mabaraba PSR Alfred Innocent MUSEREMU asaba abazana amakara bayakuye mu ntara za ruguru,kuvuga ababaka igiturire kw’ibarabara biyita abajejwe umutekano.

Mu mubonano wahuje abaserukira abadandaza kandi bakunguruza amakara,Alfred Innocent MUSEREMU arongoye PSR yemereye abunguruza amakara kubafasha gutorera inyishu ibibazo bagira mw’ibarabara bigatuma barenza urugero rutegekanijwe mu gupakira imiduga imanukana amakara.

Abadandaza amakara bavuze ko bahura n’ibibazo iyo bariko baja mu gisagara ca Bujumbura,ivyo navyo bikaba bishingiye ahanini ku bantu babahagarika bavuga ko baba bari mu mashirahamwe arwanya urudandazwa rwa magendu,bigatuma baca bapakira imiduga barengeje kugira barabe ko bogaruza amafaranga batanga kw’ibarabara.

Inyuma y’umubonano,umuyobozi w’igipolisi kijejwe umutekano wo mw’ibarabara n’abadandaza amakara,bumvikanye ko imodoka ifise ubuhinga izopakirwamwo bivanye nuko imeze,abo badandaza amakara bakaronswa kandi inomero za telefone z’abarongoye igipolisi mu ntara no mu turere kugira babahamagare mu gihe cose bizoba bikenewe.