Abanyeshuri batanze imihoho mu buserukizi bw’abanyeshuri ba kaminuza y’Uburundi batswe uturusho

Ubuyobozi bw’uburaro muri kaminuza y’Uburundi bwafashe ingingo yo kwaka uburenganzira bwo gufungura no kuryama mu bigo vya kaminuza ku banyeshuri baheruka gutanga imihoho mu buserukizi bw’abanyeshuri.

Bose hamwe ni indwi batanze imihoho, nabo ni MANIRAKIZA Fabrice,NISUNZIMANA Ismail,NIBIRANTIJE Fidele,NININAHAZWE Placide,MANIRAKIZA Eric-Ferdinand, MPONGERABANSI Mateso na BIMENYIMANA Emmanuel.

Mw’ikete ubuyobozi bw’uburaro bwa kaminuza y’Uburundi bwasohoye kuri uno wa mbere igenekerezo rya 13 Ntwaranta,umwaka wa 2017,busubiza abanyeshuri bamenyesheje ko batanze imihoho mu buserukizi bw’abanyeshuri,ubwo buyobozi bumenyesha ko uturusho twose abo banyeshuri bahorana nk’abaserukira abandi duhagaritswe.

Muri iryo kete ryateweko umukono n’icegera c’umuyobozi ajejwe umutekano, ubuyobozi bw’uburaro muri kaminuza y’Uburundi bumenyesha ko igikorwa co gutanga ivyumba gitegerezwa kuba caheze kuwa kane igenekerezo rya 16 Ntwarante ,umwaka wa 2017, mu gihe hoba hari uwutarabikora akarihishwa amafaranga 1000 ku munsi acerewe.

Ubuyobozi bw’uburaro muri kaminuza y’Uburundi bukamenyesha ariko ko mu gihe boba bari mu bategerezwa kuronka icumba kandi kihari, ata kibuza ko abo batanze imihoho mu buserukizi bw’abanyeshuri boronswe ivyumba mu bigo vya kaminuza y’Uburundi.

Abo banyeshuri bari banditse ikete rimenyesha ko batanze imihoho kw’igenekerezo rya 9 Ntwarante,umwaka wa 2017 bamenyesha ko hari inyungu z’abanyeshuri ziriko zirahonyangwa ariko ntiboroherezwe mu guserukira no kuvugira abanyeshuri.