Cameroun : Uwahora atunganya ibikorwa vy’ukurwanya Boko Haram yitavye Imana

Indege y’igisirikare ca Cameroun yo mu bwoko bwa kajugujugu yakorotse hafi y’urubibe mu gice c’uburaruko ico gihugu gihana na Nigeria, ihitana umu "Commandant" w’ingabo z’igihugu.

Général Jacob Kodji, yapfuye mw’ijoro ryo ku munsi w’Imana igihe kajugujugu yarimwo yakoroka hafi y’ahitwa Bogo, bari mu bikorwa vyo kugenzura akarere, nk’uko bishikirizwa n’umutegetsi mu gisirikare ca Cameroun.

Général Kodji niwe yatunganya ibikorwa vyo kurwanya umuhari w’iterabwoba wa Boko Haram.

Général Jacob Kodji

Abategetsi batangaza ko abandi basirikare batatu hamwe n’abandi batwara iyo ndege bapfanye nawe.

Umuhari wa Boko Haram watanguriye intambara muri Nigeria, mu nyuma utandukira mu bihugu bibanyi birimwo Cameroun, Tchad hamwe na Niger.

Umuhari wa Boko Haram umaze kwica abarenga ibihumbi 25, uvana mu zabo abashika imiriyoni 2.3, nkuko bishikirizwa n’amashirahamwe aharanira agateka ka muntu hamwe n’ishirahamwe mpuzamakungu ONU.