Gihanga : Umuporisi umwe yakomerekejwe n’amasasu

Amasasu menshi yarumvikanye mw’ijoro ryo kuri uwu wa kane i Gihanga mu ntara ya Bubanza. Mu giporisi bavuga ko yari abasuma.

Ayo masasu yumvikanye i Gihanga yarahungabanije uruja n’uruza mw’ibarabara rya Bujumbura - Cibitoke, rikaba ryasubiriye kugenderwamwo nk’igihe c’isaha zitatu z’ijoro.

Umuvugizi w’igiporisi c’Uburundi, OP1 Pierre NKURIKIYE amenyesha ko ayo masasu yatanguye kwumvikana kuva nk’isaha imwe n’iminota mirongo ine n’itanu z’ijoro, akavuga ko ari abasuma barasanye n’abajejwe umutekano i Gihanga. Ivyo abo basuma bari bivye vyarafashwe nk’uko mu giporisi c’Uburundi babishikiriza.

OP1 Pierre NKURIKIYE, umuvugizi w’igiporisi c’Uburundi

OP1 Pierre NKURIKIYE avuga ko umuporisi umwe ariwe yakomeretse muri ukwo kurasana hagati y’abasuma n’abajejwe umutekano.