Museremu: ’’Igiciro c’uruhusha rwo kugendesha imodoka ntikirahinduka’’

Umukuru w’igipolisi kigenzura uruja n’uruza mu mabarabara Alfred Innocent MUSEREMU amenyesha ko ata ngingo n’imwe yo guhindura uruhusha rwo kugendesha imodoka ihari.

Mu kiganiro yagiranye n’abakura amakara mu gihugu hagati abamenyesha ibijanye n’itegeko rishasha rijanye nuko bokwunguruza amakara,Alfred Innocent Museremu yamenyesheje ko ibihuha bimaze iminsi bishikirizwa ko impusha zishasha zo kugendesha imodoka permis biometriques zizohindurwa ari ikinyoma.

Ku bijanye n’amakuru avuga ko hari umugambi wo kuduza igiciro c’urwo ruhusha rushasha rwo kugendesha imodoka, umukuru w’igipolisi kijejwe uruja n’uruza mu mabarabara yavuze ko atarivyo kuko igiciro kizoguma ari icashinzwe.

Mu gihe umushikiranganji w’umutekano yongereje ikiringo co guhinduza uruhusha rwo kugendesha imodoka,Alfred Innocent MUSEREMU ahamagarira abatarahinduza urwo ruhusha kubikora mu maguru masha, kuko vyibonekeza ko iyo ico kiringo kigomba kirangire ariho abantu baba benshi.