Abamenyeshamakuru babiri b’insamirizi zigenga bari mu mvuto

Blaise Célestin NDIHOKUBWAYO umumenyeshamkuru wa Radio Isanganiro apfungiwe mu gasho ka komine Nyabiraba mu ntara ya Bujumbura rural, mu gihe Egide MWEMERO nawe akorera RPA yungurujwe akurwa i Uvira ajanwa gupfungirwa i Kinshassa.

Blaise Célestin NDIHOKUBWAYO yahagaritswe n’abasirikare ku muhingamo wo kuri uwu wa gatandatu, hafi y’akabare n’uburiro bita NONOKA, muri komine Mugongomanga mu ntara ya Bujumbura benshi bita rural. Blaise Célestin NDIHOKUBWAYO n’uwariko aramwunguruza (Chauffeur) ntibaramenyeshwa imvo yatumye bahagarikwa.

Blaise Célestin NDIHOKUBWAYO, umumenyeshamakuru wa RPA

Egide MWEMERO nawe, umuhinga w’ivyuma wa RPA apfunzwe kuva kw’igenekerezo rya 13 Gitugutu 2015, yahinduriwe ibohero avanwa i Uvira ajanwa gupfungirwa mu gisagara ca Kinshassa.

Amakuru atangwa na Jean-Julien Miruho, umushikiranganji w’intwaro yo hagati mu gihugu w’intara ya Kivu amenyesha ko Égide Mwemero yahinduriwe ibohero mu ntumbero y’ukumwegeza kure y’urubibe Uburundi buhana na Repuburika iharanira intwaro rusangi ya Congo.

Egide MWEMERO, umuhinga w’ivyuma w’insamirizi RPA

Egide MWEMERO, umuhinga w’ivyuma w’insamirizi RPA yafatiwe i Uvira ari kumwe na bagenzi we Manzambi Mupenge hamwe na Lucien Kanana bakorera insamirizi Le Messager du Peuple yo muri ico gihugu. Abo bamenyeshamakuru bafashwe n’uwujejwe igendereza rya gisirikare aho muri Congo.
Manzambi Mupenge hamwe na Lucien Kanana ba Le Messager du Peuple bahavuye barekurwa, igendereza rya gisirikare risigarana Egide MWEMERO wa RPA.