Accueil > Amakuru > umutekano > Agateka ka zina muntu ntikubahirijwe mu mwaka w’2013
Agateka ka zina muntu ntikubahirijwe mu mwaka w’2013
mardi 7 Nzero 2014
Ishirahamwe riharanira agateka ka zina muntu n’akapfunzwe APRODH (Association Burundaise pour la Protection des Droits Humains et des Personnes Détenues) rimenyesha ko agateka ka zina muntu kasubiriye inyuma mu Burundi. Iryo shirahamwe rikabishikiriza ryisunze ibiharuro vy’abantu bishwe, abandi barahohoterwa mu mwaka twaraye turangije w’2013.
Mu mezi cumi na kumwe gusa y’umwaka w’2013, abantu baharurwa mu majana ane na mirongo itanu (450) baragandaguwe, abagera ku majana atandatu na mirongo ibiri na bane barakomereka bikomeye. Imvo nyamukuru zatumye ubwo bwicanyi n’abakomereka biyongera ni ukutihanganirana muvya poritike, amatati y’amatongo hamwe n’ukwihorahorana hagati y’abanyagihugu.
Kubwa Petero Karaveri Mbonimpa, arongoye ishirahamwe APRODH (Association Burundaise pour la Protection des Droits Humains et des Personnes Détenues), agateka ka zina muntu muri rusangi ntikubahirijwe kuko ibiharuro bitigeze bigabanuka, bageranije n’ukungene vyari vyifashe mu mwaka w’2012. Petero Karaveri Mbonimpa amenyesha ko n’ikibazo c’ukwihanira hamwe n’ubusuma bw’abitwaje ibirwanisho vyatumye ivyo biharuro vy’abagandaguwe n’abahohotewe biduga.
- Petero Karaveri Mbonimpa, arongoye ishirahamwe APRODH
Egide Nduwimana
