Buringa : Abantu babiri banyurujwe

Abantu babiri bagizwe n’umunyeshure yiga mu mwaka w’icumi kw’ishure ryisumbuye rya Buringa i Gihanga baranyurujwe kuva ku mugoroba wo kuri uwu wa mbere. Abo bantu burijwe ku nguvu imodoka itagira iparati ndangamuduga (Plaque), ibakuye kw’ibarabara aho bari bahagaze.

Uwo munyeshure yanyurujwe ari kumwe na mugenzi we azwi kw’izina rya NIYONKURU Vincent, akaba yahamagawe kuri terefone n’uwo mugenzi we. Abababonye bakavuga ko uko ari babiri bari kumwe, uwo munyeshure aherekeje uwari yamuhamagaye.

Bageze kw’ibarabara, i ruhande y’ubunywero bita SAGA Rukoko, niho imodoka yabanyuruje yashika, bompi burizwa ku nguvu, ijisho rikaba ryabaye iryo, nk’uko abajejwe intwaro i Buringa babimenyesha.

Ababanyi b’uwo munyeshure bakavuga ko batamenye uwo muntu yamuhamagaye amukura aho yari ari.