Busoni: Umugabo n’umugore bagandaguwe bunyamaswa

Muri komine ya Busoni intara ya Kirundo, abantu babiri nibo bishwe urw’agashinyaguro ku musozi na zone ya Nyagisozi nk’uko tubimenyeshwa na musitanteri wa komine ya Busoni Leokadiya Kabihogo.

Musitanteri akaba avuga ko kuri uyu wa gatandatu mw’ijoro umugabo n’umugore bishwe bunyamaswa n’inkozi z’ikibi nubu zitaramenyekana. Abo bicanyi rero bikavurwa ko batoboye munsi y’uruhome rw’inzu babona kwinjira mu nzu, maze baca bafata umutama nyene inzu bamucumitagura ibibugita mu mutwe hose, mu nyuma abo bicanyi bakaba baciye baniga umupfasoni nawe. Bahejeje gukora ubwo bubisha, baciye babaryamika ku buriri, barapfuka n’uburengeti, baraheza baca barigira.

Ubwo bwicanyi rero bikavurwa ko bwoba bufatiye ku burozi, aho uyo muryango woba wagirizwa uburozi aho muri zone ya Nyagisozi nk’uko bivugwa n’inzego z’igiporisi mu matohoza yoba yakozwe. Abo bagandaguwe rero, bikavurwa ko boba bari baherutse guhunga umusozi bahora babako bita kumana wa Zone ya Gatare, aho bahunze bagirizwa kuroga. Gushika ubu, hakaba hamaze gufatwa umuntu umwe ku mvo z’amatohoza.

Kabihogo Lewokadiya rero akaba asaba abanyagihugu kuba maso, kugira inkozi zikibi zigandagura abantu zitwaje ko boba ari abarozi ziburizwemwo, na cane cane agasaba abanyagihugu ko bokwirarira, kandi baze baratabara ababa babahungiyeko ku bw’imvo z’umutekano wabo, mu kubatabariza ku bajejwe intwaro n’umutekano.