Buterere : Abasuma biba ijoro bahagurukiwe

Mu gucungera umutekano muri komine ya Buterere mu gisagara ca Bujumbura, abasirikare bafatanije n’abaporisi baragendura mw’ijoro, gutyo abasuma canke abandi bagizi ba nabi bakabura aho bamenera.

Ivyo bivugwa na Pauline Ruratotoye avuga ko umutekano muri iyo komine arongoye wifashe neza, kiretse ko hari uturwi tw’abasuma twiba mw’ijoro dukoresheje inkoho, co kimwe n’abasuma biba mw’ijoro. Ariko rero musitanteri w’iyo komine akavuga ko ivyo vyama vyashitse cane cane iyo hegereje impera z’umwaka. Musitanteri Ruratotoye akavuga ko yatangajwe n’urupfu rw’umukenyezi yatowe inyuma y’umunsi wose yishwe. Avuga ko yibaza y’uko abakoze iryo shano babanje kumunyuruza, aho umuryango w’uwo mugore yishwe wamuherutse agiye inyuma y’umuhingamo.

Inama y’umutekano rero na cane cane y’ugukingira abanyagihugu ubugizi bwa nabi ikaba yaciye ibera mu Kiyange, iyo nayo amarondo yo kwicungerera umutekano akaba yaciye yemezwa gukomezwa n’abasirikare hamwe n’abaporisi.