Kinindo-Nyakabiga : Abasuma bategera abatashe baragisibije

Haheze iminsi hibonekeza ubusuma bukorwa n’abantu bataramenyekana mu masaha yo mw’ijoro mu ma komine ya Nyakabiga na Kinindo. Abo basuma bategera abatashe bakabambura utwabo.

Mu Nyakabiga ya kabiri, abanyagihugu banywera ahasanzwe hazwi kw’izina rya Facebook kw’ibarabara ry’icenda bavuga ko hari abasuma bategera abatashe, abo nabo bakikinga umwijima usanzwe wibonekeza muri iyo komine kuva igihe c’isaha zine z’ijoro. Uwutashe inyuma y’ayo masha cane cane mu ma quartiers ya Nyakabiga ya mbere bahura n’abo basuma baba bariko biyerereza canke bikinze ahantu hatabona.

Eka no muri komine ya Kinindo ni nk’uko. Bamwe mu banyagihugu bo muri iyo komine bavuga ko hari abasuma bitwaje ibihiri n’imipanga basigaye bategera abantu. Mu Kibenga hakaba hari abategerewe barakwa ivyo bari bafise vyose, na cane cane amaterefone ngendanwa, imigufu y’agaciro, impeta zikozwe mu butare butandukanye kandi buzimvye, n’ibindi.

Kuri ivyo vyose bivugwa n’abo banyagihugu, ikinyamakuru IGIHE kikaba cagerageje kurondera mu giporisi ariko ntiturabaronka kugira batange umuco ku vyo urwo rwego rusanzwe rukingira abanyagihugu rwoba ruriko rurakora kugira hatuzwe ubwo busuma n’ugutegera abatashe mu makomine atandukanye y’igisagara ca Bujumbura. Niko kwuko kubajejwe intwaro baho ubwo busuma bwimonogoje. Tubandanya tubarondera.