“Igipolisi gikwiye kwigishwa uko gifata abana mu bihe vy’amatati’’

Igipolisi kirakwiye guhabwa inyigisho z’ingene bafata abana mu gihe babasanze ahari amatati. Ivyo bivugwa na David Ninganza arongoye ishirahamwe SOJPAE Burundi ryishinze guharanira agateka k’abana.

Mw’ishirahamwe SOJPAE basaba ko igipolisi cohabwa inyigisho kikamenya ingene gifata abana mu gihe kibasanze ahari amatati. David Ninganza arongoye SOJPAE akaba yabimenyesheje mu gihe muri komine Nyakabiga y’igisagara ca Bujumbura abana babiri bambitswe menote babavana kwa nyina babajana kwa se. Ivyo ni mu gihe abo bavyeyi baribarahukanye. David Ninganza aratera ivyatsi inyifato y’ico gipolisi, akagira ati : “ ni ibara kumutemere nta kuntu igipolisi cofata abo bana nk’imbohe ifise ico yagirizwa kandi ata caha bakoze. Ku mwana, umuvyeyi yama ari umuvyeyi uko ameze kwose. Umwana ntibimuraba iyo hari ingorane’’. Ku bw’ivyo igipolisi kirakwiye kwiga ingene bafata abana muri be n’ivyo bihe.

Arangiza atera akamo abavyeyi ko bari bakwiye kureka gushira ingorane zabo mu bana babo, bakerekana ishusho nziza. Umugabo ategerezwa kumenya ko umwana agumana urukundo rwa nyina n’umugore n’uko.