Inama nkuru y’umutekano yaneguye ibikorwa vya bimwe mu bimenyeshamakuru

Inama nkuru y’umutekano irashima inyifato imaze iminsi yerekanwa n’inzego z’umutekano mu ntumbero yo kurwanya akajagari. Mw’itangazo iyo nama nkuru y’umutekano yasohoye, baranegura ibikorwa vy’ibimenyeshamakuru bimwe bimwe bitanga amakuru iyo nama yita "ayo kugumura abanyagihugu."

N’aho hamaze iminsi hibonekeza ubwicanyi n’ayandi matati, inama nkuru y’umurekano irakeza ubukerebutsi bwerekanwe n’abajejwe umutekano mu kubuza imigumuko n’ibindi bikorwa vy’uguhungabanya umutekano w’igihugu. Général de Brigade, Ildephonse HABARUREMA amenyesha ko abanyagihugu n’amakungu borema kuko umutekano w’igihugu wifashe neza. Ariko rero, iyo nama nkuru y’umutekano iratera ivyatsi ibimenyeshamakuru n’amashirahamwe adaharanira ivyicaro vya poritike asasira indava abahungabanya umutekano, aho bagatanga akarorero k’insamirizi RPA yashikirije amakuru y’ikibiriraho (en direct), ku genekerezo rya 8 Ntwarante, umunsi abanywanyi ba MSD bariko batana mu mitwe n’abaporisi. Kubwa Général de Brigade, Ildephonse HABARUREMA, ayo makuru nta yindi ntumbero afise atari ukugumura abanyagihugu.

Inama nkuru y’umutekano yasavye urwego CNC gusubiza ku murongo ivyo bimenyeshamakuru, umukuru w’igisagara ca Bujumbura nawe agasabwa gutunganya neza ingene ukwinonora imitsi mu kivunga vyogenda (Sport de masse), n’ibibanza bizwi vyokorerwamwo, kuko kenshi bishika abashaka guhungabanya umutekano bakinyegeza inyuma y’ukwinonora imitsi mu kivunga.