Inguvu Uburundi bwerekana muri Somaliya zirakengurukwa n’abatari bake

Mu gihe bariko barahimbaza imyaka 51 ihaciye turonse intahe y’ukwikukira, kuri uyu wa mbere igenekerezo rya 1 Mukakaro 2013, ingabo z’igisirikare zarerekanye imbere y’abategetsi b’abarundi n’abanyamahanga umunezero bafise ku ntambwe bagezeko mu gufasha kugarukana amahoro mu gihugu ca Somalie n’ahandi kw’isi.

« Inguvu twerekena zarashimwe kw’isi yose mu gikorwa co kugarukana amahoro muri Somaliya kandi n’ibindi bihugu biri mu ntambara bikaba vyipfuza navyo ko twobifasha », ivyashikirijwe na colonel Gaspard Baratuza, umuvugizi w’igisirikare c’Uburundi. yongeye amenyesha ko ingabo zishika 5600 zo mu mabatayo atandatu, arizo ziriko zirafasha bimwe biboneka kandi ko ku mwaka ku mwaka barungika ingabo muri Somaliya mu ntumbero yo kugarukana amahoro.

« Mogadishio isigaye ifise umutekano kubera igisirikare c’Uburundi, n’abanyasomaliya barabinezererewe, ndetse bakipfuza kandi ko abasirikare b’abarundi bogumayo igihe kirekire ». Abandanya avuga ko intwazangabo z’Uburundi zitanze mu gushika muri Baidoa, igisagara gifise ubu umutekano ariko gifatwa nk’ahahoze hari abagwanyi ba El-Shebab bakomeye. Ibirori vy’uwo munsi wo guhimbaza intahe yo kwikukira, vyaranzwe na defile ndende y’intwazangabo z’igisirikare n’igipolisi, ikimenyetso cerekana ko igihugu cikukiye.

Iyo defile ikaba kandi yari yitabwe n’inzego z’igihugu zitandukanye n’amashirahamwe atari make asanzwe akorera hano mu Burundi. Abapara nabo bakaba barerekanye ubumenyi bafise mugukoroka bava mu ndege iri mu kirere, imbere y’umurongozi wabo, umukuru w’igihugu Petero Nkurunziza n’imbere y’abatumire b’icubahiro, nk’umukuru w’igihugu c’Urwanda, Paul Kagame, umukuru w’igihugu ca Kenya Uhuru Kenyatta eka n’abandi batumire barungitswe, baje bava mu bihugu nka Gabon, Ouganda, Tanzanie ,Republika iharanira intwaro rusangi ya Congo, n’ahandi.