Rutana : Abana babiri bo mu muryango umwe bagandaguwe

Abana babiri bo mu muryango umwe nibo bagandaguwe hakoreshejwe imipanga muri komine ya Mpinga-Kayove mu ntara ya Rutana.

Ku musozi wa Muganzo, komine Mpinga-Kayove intara ya Rutana, akaba ariho habereye iryo bara. Umwana w’imyaka ibiri hamwe n’uwundi w’imyaka itandatu bose bava mu muryango umwe, bakaba aribo bagandaguwe hakoreshejwe umupanga. Abo bana bose bishwe n’umwe mu ncuti zabo, bivugwa ko yoba adakwije neza mu mutwe. Inyuma y’ugukora iryo shano, uwo murwayi wo mu mutwe nk’uko bivugwa, akaba yaciye yigira.

Mu ntwaro muri iyo komine ya Mpinga -Kayove, bakaba basavye abantu bose canke imiryango yose yoba ifise bamwe mu bakehabwenge, ko bobakurikiranira hagufi, kugira ntibaze barakora amabi nk’ayo. Ivyo bikaba vyashikirijwe na musitanteri w’iyo komine, inyuma y’ukumenya ko abo bana babiri bishwe. Abo bana bishwe, bakaba baciye bafubanwa iteka.