Mu gipolisi barahumuriza ku masasu yumvikanye ejo mu gisagara ca Bujumbura

Mu gipolisi c’Uburundi bararemesha ku masasu yaraye yumvikanye muma komine ya Gihosha, Cibitoke na Nyakabiga mw’ijoro ry’ejo kuwa mbere rishira iryo kuwa kabiri, bakamenyesha ko bari abasuma bariko bashaka gukora ubugizi bwa nabi.

Mu kiganiro yagiranye n’umumenyeshamakuru w’insamirizi y’abanyagihugu RPA kuri ngendanwa, icegera c’umuvugizi w’igipolisi c’Uburundi, Petero Nkurikiye amenyesha ko ayo masasu yumvikanye muma komine atatu atandukanye ata sano ahanini afitaniye, uretse abagizi ba nabi bari bitwaje ibirwanisho.

Mu Gihosha, umugizi wa nabi yateye igerenade kuri komine yonona imodoka. Abapolisi baragerageje kumukurikirana ariko abaca murya humwe.

Muri Komine Cibitoke, abapolisi bari mu bikorwa vyabo vya minsi yose vyo gukizura, bahura n’abitwaje ibirwanisho, baca batangura kurasana.

Mu Nyakabiga naho, abanyagihugu batanu bari bavuye mu bunywero kwivuna akanyota, bahura n’uwitwaje ikirwanisho co mu bwoko bwa pistolet, aca arabarasa, umwe muri bo arakomereka.

Petero Nkurikiye, umuvugizi w’igipolisi c’Uburundi akaba ahumuriza, amenyesha ko ari ibikorwa bisanzwe vy’ubugizi bwa nabi, akamenyesha ko bagiye gukomeza umutekano cane cane mu bice bibonekamwo umwijima mw’ijoro, mu gisagara ca Bujumbura. Amenyesha kandi ko bagiye gukomeza ibikorwa vyo gusaka ibirwanisho vyoba bitunzwe n’abanyagihugu batabifitiye uruhusha.

Petero Nkurunziza yarangije asaba abanyagihugu gukomeza gukorera hamwe n’abajejwe umutekano, hagize ico bikeka bakakimenyeshe abajejwe umutekano.