Musaga : Abari mu myiyerekano bagendana amasanamu atahora akoreshwa

Inyuma yaho hari abagiye mw’ibarabara biyamiriza ikiringo kigira gatatu ca Petero NKURUNZIZA ,ubu naho muri komine ya Musaga bazanye umurindi mushasha nkuko vyasabwe n’abari mu mashirahamwe y’igenga n’imigambwe.

Abari mu myiyerekano muri iyi komine ya Musaga, bonyene nibo bayicungerera. urenganye ikambi ya Muha utera uja ku rya mbere rya Musaga, niho ubona ikirindiro c’abaporisi ubona bicaye munsi y’ibiti biboneka ko barushe cane, uharuye nk’imetero mirongo itanu, ubona ikirindiro c’abanyagihugu, baguma baririmba biyamiriza ikiringo ca gatatu c’umukuru w’igihugu , bafise ivyapa vyanditse :’’ Turanse ikiringo ca gatatu’’

Kuri ivyo vyapa , twasanze bifise umwe mu miyabaga yaho ku Musaga, yari afise ifoto iriko Abantu nka Petero Nkurunziza, Alain Guillaume Bunyoni, Adolphe Nshimirimana na Gervais Ndirakobuca batazira Ndakugarika, handitseko ko, abo aribo bapfukamye igihugu mu nda. Ubajije abo bari muri iyo myiyerekano, bakubwira ko abo bagabo aribo batuma amaraso aseseka, ndetse ko n’isesagurwa ry’ubutunzi aribo barikora.

Muri iyo komine ya Musaga rero, abanyagihugu baho bakavuga ko atacizere namba bafitiye abaporisi, kuko bavuga ko babarasa, ndetse bakanabatera amagerenade hamwe n’ivyuka vyokera. Imiduga y’abo mw’ishirahamwe croix rouge n’igisirikare niyo yonyene ibahaboneka hamwe n’abamenyeshamakuru gusa. Iyo komine yose ikaba itagira umuporisi ayicungereye, aho uyiheza, ugasanga abandi bicaye ku kiraro kigabura Musaga na Kanyosha.

Mwomenya ko n’igituro c’imiduga ija hagati mu gihugu mu ntara za Mwaro n’ahandi, ubu cungururijwe mu misozi ihanamiye iyo komine.