Tharcisse Nkezabahizi: RPA yugawe ivy’agateganyo

Umushikiranganji wo kumenyeshamakuru yavuze aho ahagaze kw’iyugarwa ry’iradiyo y’abanyagihugu (RPA). Avuga ko RPA yahagaritswe ivy’agateganyo ariko ubutungane n’ibwo buzoca urubanza, bukerekana amategeko yarenzwe.

Tharcisse Nkezabahizi aramutswa ubushikiranganji bw’itumatumana ry’amakuru avuga ko abashikiranganji Eduard Nduwimana, Tharcisse Nkezabahizi na Gabriel Nizigama bagiye gusaba RPA ko yohagarika gutanga amakuru y’ikibiriraho. Avuga rero ko bumvikanye n’abayobozi ba RPA uko botanga ayo makuru hanyuma RPA ntiyabikurikiza, ariko kuyugara ivy’aagteganyo. Uwo mushikiranganji abandanya avuga ko RPA yariko ikavya mu gutanga amakuru ajanye n’imyiyerekano yariko iraba. Naho hari n’ayandi maradiyo yariko ashikiriza amakuru y’ikibirira ho ku myiyerekano, RPA yoyo yaragumura nk’uko bivugwa n’uwo mushikiranganji. Abandanya amenyesha ko amategeko yarenzwe uwo munsi, azoheza akavugwa n’ubutungane(Ministere Public).

Nk’uko vyibazwa na benshi, amenyesha kandi ko ata yandi maradiyo agiye kwugarwa naho hari ayabandanya atanga amakuru y’ikibiriraho, bitandukanye n’ivyo bumvikanye. Mwomenya ko n’amaradiyo BONESHA FM n’ISANGANIRO yaciriwe imirongo ishikana amakuru hagati mu gihugu, eka no guhana amakuru biciye kuri Whatsapp vyahagaritswe.