Ubuserukizi bwa Amerika busaba Reta kwugurura ibigo vya kaminuza y’Uburundi

Ubuserukizi bw’Amerika hano mu Burundi bumenyesha ko ingingo ya Reta y’Uburundi yo kwugara kaminuza y’Uburundi yateye ingorane zitarizikenewe muri kino mbere ko itanasiguritse ,mbere basaba ko iyo kaminuza yosubira kwugururwa .

Inyuma y’aho abanyeshure bo muri kaminuza y’Uburundi bagiye gusaba gukingirwa kuri ubwo buserukizi, ubuserukizi bw’Amerika hano mu Burundi bwasohoye itangazo kuri uno wa gatanu, igenekerezo rya 1 Rusama. Muri iryo tangazo bavuga ko mw’ijoro ryo kuwa 30 Ndamukiza uno mwaka, Dawn Liberi arongoye ubuserukizi bw’Amerika hano mu Burundi hamwe n’intumwa ya Reta y’Amerika yari murugendo mu Burundi, bagendeye abo banyeshure amajana atandatu ba kaminuza y’Uburundi bari imbere y’ubwo buserukizi basaba ubuhungiro no gukingirwa umutekano.

Muri iryo tangazo ,bavuga ko bashoboye kwumviriza abo banyeshure ,abo nabo barashobora kubashikiriza ingorane zose bahura nazo,inyuma y’ingingo ya Reta y’Uburundi yo kwugara ibigo vya kaminuza y’Uburundi baheza babata mw’ibarabara. Iryo tangazo rivuga ko Dawn Liberi hamwe na Malinowski bashimiye cane abo banyeshure ku butekereji ,n’indero bafise hamwe n’ukuntu bafitaniye imigenderanire myiza hagati y’igipolisi hamwe n’abakozi b’ubwo buserukizi .Muri ivyo biganiro rero ,bashoboye kwibutsa abo banyeshure ko intwaro rusangi hamwe n’agateka ka zina muntu ari nkenerwa cane muri kino gihugu c’Uburundi.

Ubuserukizi bwa Reta zunzubumwe bw’ Amerika hano mu Burundi bwaciye buhamagarira Reta y’Uburundi gutorera inyishu ico kibazo cabo barundi bafise ingorane yo gusubira mu buraro bwabo. Ati :’’N’abana b’Uburundi bashagaje muri kino gihe mw’ibarabaraba imbere y’ubuserukizi bwa Reta zunzubumwe bw’ Amerika. Muri iryo tangazo babandanya bavuga ko ingingo ya Reta yo kwugara ibigo vya kaminuza yateye ingorane n’imibabaro itari ikenewe, muri kino gihe mbere idasiguritse ku bashikirije ivyiyumviro vyabo gusa mu vyerekeye poritike. Iryo tangazo kandi babandanije bamenyesha ko batarota birukana urwo rwaruka imbere y’iyo nyubakwa mu gihe boguma batekanye . Reta zunzubumwe z’Amerika zisaba Reta y’Uburundi gusubira kwugurura iyo kaminuza, kugira amahoro n’umutekano bisubire kugaruka.

Tubamenyeshe ko abo banyeshure baraye ijoro ryabo rigira kabiri imbere y’ubwo buserukizi bwa Amerika hano mu Burundi, butuye muri karitiye ya Kigobe hano i Bujumbura.