Abacamanza 10 bemejwe n’inama nkenguzamateka

Umushikiranganji w’ubutungane Aimée Laurentine KANYANA yamenyesheje ko abo bacamanza n’abashikirizamanza basabwe ko bemezwa kuko bipfuje gusubiriza abakora muru rwego rw’ubutungane bagiye mu yindi mirimo hamwe n’abandi batakiri hafi.

Abemejwe bazokorera muri sentare ntahinyuzwa ni Anne Marie NKESHIMANA umuhutukazi wo mu ntara ya Rumonge, Celestin NSAVYIMANA umuhutu wo mu Kayanza, Mediatrice KANYANA umuhutukazi ava mu ntara ya Muyinga, Yves NDUWIMANA umututsi wo mu gisagara ca Bujumbura, Godelieve MBONIGABA umututsikazi wo mu ntara ya Bururi hamwe na Jeremie MANIRAKIZA umuhutu ava mu ntara ya Ngozi.

Abandi bemejwe ni Jean SINDAYIZERUKA umuhutu wo mu ntara ya Bujumbura agiye kuba umukuru wa sentare isubiramwo imanza y’i Gitega, Spes Caritas BISHOBOYE agiye kuba umukuru wa sentare ijejwe ivy’intwaro mu gisagara ca Bujumbura, Odette NSHEMEZIMANA umuhutukazi wo gisagara ca Bujumbura agiye kuba umukuru wa sentare nkuru ya Ntahangwa hamwe na Perpetue NDIZEYE umututsikazi ava mu ntara ya Ngozi agiye kuba umushikirizamanaza mukuru wa Repuburika mu ntara ya CANKUZO.

Inama nkenguzameteka yabemeje ijana kw’ijana ku bakenguzamateka 35 bari bitavye hamwe n’abakenguzamateka 3 bari batumye.